Pablo Picasso

Dr Pablo Picasso (äigentlig Pablo Diego José Francisco de Paula Juan Nepomuceno María de los Remedios Cipriano de la Santísima Trinidad Ruiz y Picasso, * 25. Oktober 1881 z Málaga, Spanie; † 8. April 1973 z Mougins, Frankriich) isch e spanische Mooler, Grafiker und Bildhauer gsi und gältet as eine vo de bedütendste Künstler vom 20. Johrhundert. Si umfangriichs Gsamtwärk vo Gmäld, Zeichnige, Grafike, Plastike und Keramike het e groosse Iifluss uf d Kunst vo dr Modärne. Es isch brägt dur e groossi Vilfalt vo künstlerische Usdrucksforme, wo vo klassischer bis zu abstrakter Darstellig göhn. D Gmäld us siine Blaue und Rosa Periode und d Begründig vom Kubismus zsämme mit em Georges Braque si dr Aafang vo siiner usserordentlige Künstlerlaufbahn. Zu de bekanntiste Wärk vom Picasso ghöre s präkubistische Gmäld Les Demoiselles d’Avignon (1907) und s monumentale Guernica (1937), e künstlerischi Umsetzig vo de Schrecke vom Spanische Bürgerchrieg. S Motiv vo dr Duube uf em Blakat, won er im Johr 1949 für dr Bariser Wältfriidenskongress entworfe het, isch wältwit zum Friidenssymbol worde.